媒體報導: 首個環保站落戶沙田

2015/04/07

香港人越嚟越重視環保，好多時候都會將汽水罐、玻璃樽等分類，希望循環再用，但回收嘅地方始終唔多，有時都唔知點算好！施政報告早前就宣佈喺全港18區興建社區環保站，交畀營運團體負責做統籌同聯絡，向各區屋苑收集認為價值低嘅物料，好似電器、慳電膽同充電池等。

環保署向八方報喜，話全港首個社區環保站喺沙田安平街同安心街交界，改咗名叫「綠在沙田」，已經試運緊，年中全面啟用。環保署助理署長黎耀基話，環保站唔等於垃圾站，好似沙田呢個環保站又乾淨又靚，除回收廢物，仲有教育中心、多用途活動室，甚至可以搞展覽。政府經過公開招標後，環保站會由基督教家庭服務中心負責營運。

八方都實地參觀過，雖則個站嘅建築工程費要成超過2,000萬，但又真係幾靚。建築署高級建築師溫灼均稱，環保站以「竹棚」為設計概念，仲加入垂直綠化，打造成城市綠洲，又將貨櫃改裝為辦公室，有啲就拆咗貨櫃兩邊，改用玻璃採自然光，電費都用少啲。